गुत्तेदाराने धाराशिव महसूल प्रशासनाच्या डोळ्यात मुरमाची धुळ फेकत लावला लाखो रुपयाला चुना

 परवानगी एका ठिकाणची, मुरुम उचलला दुसरीकडून; लाखो रुपयांचा शासकीय महसूल बुडण्याची भीती ?

काक्रंबा (ता. तुळजापूर) 

कंत्राटदाराचा महसूल प्रशासनाला 'गुलिगत धोका' 

तुळजापूर–लातूर महामार्गावरील काक्रंबा येथील बहुप्रतीक्षित उड्डाणपूलाचे काम सुरू झाल्याने स्थानिकांना दिलासा मिळाला असतानाच, या कामाशी संबंधित गोंधळत आणखी गंभीर माहिती समोर येत आहे. कंत्राटदार कंपनीने बांधकामासाठी लागणाऱ्या मुरुमासाठी महसूल प्रशासनाला ‘गुलिगत धोका’ देत सरकारी यंत्रणांची दिशाभूल केल्याचे स्पष्ट संकेत मिळत आहेत.

परवाना एका ठिकाणचा उपसा मात्र भलत्याच ठिकाणी ?

पहिल्या टप्प्यात समोर आलेल्या माहितीप्रमाणे, मुरुमाचे उत्खनन अनधिकृत पद्धतीने काक्रंबा आणि आजूबाजूच्या गावांमधून रात्रीच्या वेळी जेसीबी व डंपरच्या सहाय्याने सुरू असल्याचे निदर्शनास आले. आता या घडामोडींना आणखी गंभीर वळण मिळाले असून, संबंधित कंत्राटदाराने केवळ नाममात्र परवानग्या घेतल्या असल्याचे उघड झाले आहे. विशेष म्हणजे, ज्या भूखंडासाठी परवानगी घेतली गेली होती, त्या जागेवर प्रत्यक्षात कोणतेही उत्खनन झालेले नाही. उलट, मुरुम उचलला गेला तो सर्वस्वी वेगळ्या, बिनपरवानगीच्या ठिकाणाहून.

महसूल प्रशासनाच्या डोळ्यात मूरमाची धूळ फेकत केली दिशाभूल..

या प्रकारामुळे महसूल विभागाला लाखो रुपयांचा फटका बसण्याची शक्यता असून, सरकारच्या महसुलावर टाच आली आहे. चिल्लर परवानग्या घेऊन मोठ्या प्रमाणावर मुरुम उपसा केला गेला आहे, हे निदर्शनास येत आहे. कामाचे खरे गणित पाहता ज्या प्रमाणात मुरुम लागत आहे आणि ज्या प्रमाणात परवानगी घेतली गेली आहे, त्या आकड्यांमध्ये फारकत स्पष्ट आहे.

नागरिकांमधून रीतसर चौकशी करण्याची मागणी..

या साऱ्या पार्श्वभूमीवर आता नागरिकांनी कंत्राटदाराविरोधात सखोल चौकशीची मागणी केली आहे. सरकारच्या शिरसावदीवर उभारल्या जाणाऱ्या उड्डाणपूलाच्या कामात जर अशा पद्धतीने अपारदर्शकता आणि फसवणूक होत असेल, तर हा विकास नव्हे, तर लुबाडणूक ठरेल, अशी तीव्र भावना लोकांमध्ये आहे.

महसूल विभाग फक्त बघ्याच्याची भूमिका घेणार का कार्यवाही करणार ?

प्रशासनाने या गंभीर प्रकाराची तत्काळ दखल घ्यावी आणि दोषींवर कठोर कारवाई करत शासकीय महसूल वाचवावा, अशी मागणी जोर धरू लागली आहे.