रुईभर दत्त मंदिरात दत्त जयंती महोत्सवाची भव्य दिंडी शासकीय वैद्यकीय महाविद्यालयाचे अधिष्ठाता डॉ. शैलेंद्र चौहान यांनी घेतले सपत्नीक दर्शन

        रुईभर दत्त मंदिरात दत्त जयंती महोत्सवाची भव्य दिंडी

शासकीय वैद्यकीय महाविद्यालयाचे अधिष्ठाता डॉ. शैलेंद्र चौहान यांनी घेतले सपत्नीक दर्शन 

रुईभर (धाराशिव): मनोज जाधव 

धाराशिव तालुक्यातील रुईभर येथे श्री दत्त मंदिर संस्थानात दत्त जयंती महोत्सवाचे भव्य आयोजन करण्यात आले. पहाटेपासूनच हजारो भाविकांच्या गर्दीने संपूर्ण परिसर भरून गेला होता. नामस्मरण, पूजा-अर्चा, भजन-कीर्तन आणि विविध धार्मिक उपक्रमांमुळे मंदिर परिसर भक्तीमय वातावरणाने दुमदुमला.

या पवित्र दिवशी धाराशिव येथील शासकीय वैद्यकीय महाविद्यालयाचे अधिष्ठाता डॉ. शैलेंद्र चौहान यांनी आपल्या कुटुंबासह श्री दत्त मंदिराला भेट दिली. त्यांनी श्री दत्तगुरू महाराज तसेच श्री संत आप्पा बाबा महाराज यांच्या चरणी नतमस्तक होत विशेष पूजा-अर्चा केली. शांत, पवित्र आणि आध्यात्मिक वातावरणात त्यांच्या भेटीने भाविकांमध्ये उत्सुकता वाढली.

डॉ. चौहान यांच्या आगमनानिमित्त श्री दत्त मंदिर संस्थान, रुईभर यांच्या वतीने त्यांचा आणि त्यांच्या पत्नींचा सपत्नीक सत्कार करण्यात आला.

सत्काराचे मानकरी होते — सामाजिक कार्यकर्ते आकाश चव्हाण, माजी उपसरपंच भगीरथ लोमटे आणि बाळासाहेब जावळे, यांच्या हस्ते डॉ. चौहान यांना मानपत्र, शाल, पुष्पहार आणि श्रीफळ देऊन गौरविण्यात आले.

मंदिर संस्थानच्या पदाधिकाऱ्यांनी डॉ. चौहान यांच्या सामाजिक व आरोग्य क्षेत्रातील उल्लेखनीय योगदानाचे कौतुक केले. त्यांच्या उपस्थितीमुळे दत्त जयंतीच्या उत्सवाला अधिक उत्साह, भक्तिभाव आणि आध्यात्मिकतेची जोड मिळाली.

कार्यक्रमात मोठ्या प्रमाणावर भाविकांनी सहभाग घेत, दर्शन व धार्मिक कार्यक्रमांचा लाभ घेतला. संपूर्ण महोत्सवात नितांत श्रद्धा, भक्ती आणि सामूहिक उत्सवाची झळाळी पाहायला मिळाली.