धाराशिव तालुक्यात ड्रॅगन फ्रुट उत्पादक शेतकऱ्यांवर पावसाचे मोठे संकट!

 

       प्रतिनिधी....मनोज जाधव 

📰 धाराशिव तालुक्यात ड्रॅगन फ्रुट उत्पादक शेतकऱ्यांवर पावसाचे मोठे संकट!

लाखो रुपयांचे नुकसान; शेतकऱ्यांची सरकारकडे तात्काळ मदतीची मागणी

धाराशिव, दि. ५ ऑक्टोबर — धाराशिव जिल्ह्यात सुरू असलेल्या सततच्या पावसामुळे शेतकऱ्यांचे मोठे आर्थिक नुकसान होत आहे. धाराशिव तालुक्यातील मौजे मेडशिंगा गावातील ड्रॅगन फ्रुट उत्पादक शेतकऱ्यांवर मात्र पावसाने अक्षरशः कहर केला आहे. सलग पडणाऱ्या मुसळधार पावसामुळे या शेतकऱ्यांच्या संपूर्ण फळबागा पाण्याखाली गेल्या असून लाखो रुपयांचे नुकसान झाले आहे...

या गावातील नामांकित ड्रॅगन उत्पादक शेतकरी अण्णा रणदिवे, दत्ता रणदिवे, महादेव आगळे, बळीराम आगळे तसेच रावण शित्रे यांच्या या वर्षीच्या सर्व फळबागा अतिवृष्टीमुळे पूर्णपणे नष्ट झाल्या आहेत. या शेतकऱ्यांनी मोठ्या मेहनतीने, कर्ज काढून आणि आधुनिक शेती तंत्र वापरून ड्रॅगन फ्रुटची लागवड केली होती. मात्र, पावसाने त्यांच्या सर्व स्वप्नांवर पाणी फिरवले आहे.

आर्थिक संकटात सापडलेल्या या शेतकऱ्यांकडून आता सरकारकडे तात्काळ मदतीची मागणी होत आहे. शेतकरी वर्गाचे म्हणणे आहे की,

“सरकारने फळबागांचा वैयक्तिक पंचनामा करून एकरी किमान दोन लाख रुपयांची आर्थिक मदत तत्काळ द्यावी, अन्यथा आम्हाला उभं राहणंही कठीण होईल.”

धाराशिव जिल्ह्यातील कृषी विभागाने या नुकसानीची तात्काळ दखल घेऊन सर्वेक्षण सुरू करावे, अशी मागणी स्थानिक ग्रामस्थ व शेतकरी संघटनांनी केली आहे...

🌾 धाराशिव जिल्ह्यातील ड्रॅगन फ्रुट उत्पादक शेतकऱ्यांच्या मदतीसाठी प्रशासन पुढे येणार का? हा प्रश्न सध्या शेतकऱ्यांच्या मनात घर करून बसला आहे.